Mirror Arts
Joomla Templates and Joomla Extensions by JoomVision.Com
Wednesday, 03 July 2013 08:04

කාන්තාරයේ ප්‍රේම කතාවක්

Rate this item
(0 votes)
කාන්තාරයේ ප්‍රේම කතාවක්

"දැන් කාලෙ මිනිස්සු කරන්නෙ තිරිසනුන්වත් නොකරන වැඩ” ය යනු මේ කාලේ නිතර අසන්නට ලැබෙන කතාවකි. මාධ්‍ය මගින් අසන්නට දකින්නට ලැබෙන ඇතැම් පුවත් ඉහත කියුමෙහි අසත්‍යයක් ද නැතැයි සිතන්නට අප පොලඹවයි. අවට ලෝකයේ සිදුවන අමානුෂික දෙයින් අප සසල වනු දකින වෘද් ලේඛකයෙක් නිතර කියන්නට පුරුදුව සිටි දෙයක් මට සිහිපත් වෙයි.

"ජාතක කතා පොත කියවන්නග ඒකේ ඔය හැම දෙයක් ම තියෙනවා.”

එතුමා එදා කියූ දෙය සැබෑවක්ම බව,කාලයාගේ ඇවෑමෙන් දැන් අපට ද පසක් වෙයි. මිනිසා තුළ සිටින උතුම් මිනිසා මෙන්ම පහත් තිරිසනා ද වෙන් වෙන්ව හඳුනා ගැනීමට ජාතක කතා අපට පිහිට වෙයි.

මිනිසා තුළ තිරිසන් ගති ද තිබෙන බවට තර්කයක් නැත. තිරිසනුන් තුළ මිනිස් ගති තිබිය නොහැකිද? හහ්, හහ් හා සිග්මන් මන් ෆ්‍රොයිඩ්, ඩෙස්මන්ඩ් මොරිස් වැනි 'අමුතු ජාතියේ මිනිසුන්’ කිහිප දෙනකු මිස අනෙක් මිනිසුන් එය පිළිගැනීමට අදිමදි කරනු ඇත්තේ තම වර්ගයාගේ හැදිච්චකම ගැන ඇති මාන්නය නිසාය. ඉහත කී අමුතු ජාතියේ මිනිසුන් අතර,ප්‍රංශ ගත්කරු ඔනරේ ඩී බල්සාක් (1799 – 1850) ද ඇතැයි මා පවසන්නේ ලිඛිත සාක්ෂි සහිතවය. රුසියානු ලේඛක ඉවාන් තුර්ගේනිෆ් ද ඒ අතරට එක් කළ හැකිය.

තුර්ගේනිෆ්ගේ "මුමූ” නැමැති ශ්‍රේෂ්ඨ කෙටිකතාවට විෂය වන්නේ යෝධයෙකු මෙන් උස මහත වුවද උපතින්ම ගොළු බිහිරි ගෙරාසිම් නමැති අහිංසක පුද්ගලයෙකු හා බැල්ලියක අතර ඇතිවන අපූරු සබඳතාවකි. එම කතාවෙහි අවසානයට ළඟාවන විට සියුම් සිතැති පාඨකයෙකු නෙතඟ කඳුළක් නැඟෙනු නොඅනුමානය.මිනිසුන් හා සතුන් අතර ඇතිවන විවිධාකාර සබඳතා පිළිබඳව කියැවෙන කතා, ලෝක සාහිත්‍යය තුළ විවිධ භාෂාවන්ගෙන් පළව ඇතත්, ප්‍රංශ ලේඛක බල්සාක්ගේ (කාන්තාරයේ අනුරාගය ලාලසාව) ඒ සියල්ල අභිභවා පෙරට එයි.

බල්සාක් තම කතාවට චරිත තෝරා ගන්නේ ඉතිහාසයේ එන ශෝචනීය සත්‍ය සිදුවීමක් තුළිනි. 1798 දී නැපෝලියන් විසින් සිදු කළ අසාර්ථක ඊජිප්තු ආක්‍රමණයෙහිදී, සෙබළුන්ට අමතරව භූමි සිතියම් නිර්මාපකයින් හා චිත්‍ර ශිල්පීන් ද එහි යවන ලදී. යටත් කර ගන්නා භූමිය සිතියමට හා සිතුවමට නඟා, සියරට ගෙන ඒම ඔවුන් සතු රාජකාරිය විය.

මෙසේ එහි යන වෙන්චර් ඩී පැරඩිස් නමැති අතිදක්‍ෂ චිත්‍ර ශිල්පියාගේ ආරක්‍ෂකයා වශයෙන් කටයුතු කරන්නේ ඔගස්ටින් රොබට් නමැති තරුණ නිලධාරියෙකි.

කාන්තාරයේ අතරමං වන මේ දෙදෙනා සා පිපාසාව දරාගත නොහැකිව බොහෝ දුක් විඳිති. වියරු වැටෙන චිත්‍ර ශිල්පියා සිය තීන්ත පවා කා දමයි. අවසානයේ ඔහු හිසට වෙඩි තබාගෙන දිවි නසා ගනී. නිලධාරියාගේ අශ්වයා ද මිය යයි. එතැන් සිට බල්සාත් තම පරිකල්පනාත්මක කාන්තාරය තුළ,ඔගස්ටින් නමැති එම නිලධාරියා පසුපස හඹා යන්නට වෙයි. අරාබීන්ට හසු වුවද,ඔවුනගෙන් ගැලවී තම හමුදා කඳවුර පිහිටි ඉසව්ව සොයමින් ගමන් කරන ඔගස්ටින් ක්ෂේම භූමියක් බඳු තැනකට ළඟාවෙයි.දැඩි ලෙස වෙහෙසට පත්ව සිටින ඔහු ගල්තලයක් මත වැතිර නිදන්නට වෙයි.

මධ්‍යම රාත්‍රියේ ඇසුණු කිසියම් අස්වාභාවික ශබ්දයකින් ඔහු අවදි වෙයි. අන්ධකාරය මැදින් කහ පැහැති එළිය බිඳු දෙකක් දිස්වෙයි.ඔගස්ටින්ගේ ලොමු දැහැ ගැන්වුණේය. ඔහුට අඩි දෙක තුනකට ඔබින්,මේ ගල්තලාවේ අයිතිකාරයා ද වැතිර සිටීග ඒල අඳුන් දිවි දෙනකි.

බල්සාක්ගේ කතාව ගොඩනැඟෙන්නේ මහ පාළු කාන්තාරයේ මේ දිවි දෙනත්,ඔගස්ටින් නමැති තරුණ ප්‍රංශ හමුදා නිලධාරියාත් අතර ඇතිවන ලාලසාත්මක සබඳතාව වටාය.

අපගේ පරිවර්තන සාහිත්‍යයට ඉමහත් සේවාවක් කළ කේග ජීග කරුණාතිලකයන් අතින්, බල්සාක්ගෙ කතාව සිංහලට නැඟුණේ "වැලි කතරක අතරමංව "නමිනි. (එය, එනමින් ම යුත් කෙටිකතා සංග්‍රහයට ඇතුළත් ය. ගොඩගේ ප්‍රකාශන 1996)

අමෙරිකානු සිනමාකාරියක වන ලැවීනියා කුරියර් අරාබි කාන්තාරයේ අතරමංවීම පිළිබඳව සිහින මැව්වේ ඇගේ තුරුණු වියෙහි සිටම ය.

එක් දිනෙක නයිල් නදී තීරයේ සිට, කුඩා සාක්කු පිහියකින් තම කෙස් වැටිය කපා දමන ඇය, අවශ්‍ය කළමනා ද රැගෙන සහරා කතර තුළට ගමන් කරයි. ඊට මාස කීපයකට පසු කිළිටි ඇඳුමින් ද,දුර්වර්ණ මුහුණින් ද යුත් ඇය ටියුනීසියාවේ පිහිටි සිය ඥාතිවරියකගේ දොරකඩ අසලට එයි.

ඊට වසර දහඅටකට පසු, බල්සාක්ගේ කතාව ඇසුරින් චිත්‍රපටය කිරීම සඳහා ලැවීනියා කුරියර් ජෝර්දානයට ගොස් සිටියදී කාන්තාරයේ තනිවීම පිළිබඳ අත්දැකීම ගැන කිසිවෙකු ඇගෙන් ඇසුවේය. "මේ චිත්‍රපටය ඒ අත්දැකීමේ ප්‍රතිඵලය තමයි”

ලැවීනියා ජීවිත කතරේද තනි වූ කතකි. ඇය කුඩා වියේදීම ඇගේ මව්පියෝ ගමන් කළ ගුවන් යානය බර්මුඩා ත්‍රිකෝණයට අයත් සාගරයට කඩා වැටී අතුරුදහන් වූහ. "ඒ වගේ සිද්ධියකට කුඩා ළමයෙක් හැටියට මුහුණපාන එක හරිම අවාසනාවන්තයි.ඉන් පසුව ජීවිතයේ ස්ථිර හෝ නිශ්චිත කිසිම දෙයක් ගැන හැඟීමක් ඇතිවන්නේ නැහැ.ඕනම දෙයක් ඕනම තමාහොතක කඩා වැටෙන්න පුළුවන්” ඇය පවසයි.

බල්සාක්ගේ කතාව ඇසුරින් තිරනාටකයක් ලියන ලැවීනියා එය තම ගුරුවරයෙකු වූ යෝචී මත්සුයේට පෙන්වයි.මත්සුයේ යනු අකිර කුරසාවාගේ "දර්සු උසාලා” ඇතුළු දැවැන්ත චිත්‍රපට කීපයක නිෂ්පාදකවරයාය. "මේ චිත්‍රපටය කරන්න දසකයක්වත් ගත වෙයි” මත්සුයේ එසේ කීව ද ලැවීනියා ඉන් වසර තුනකට පසු තම සිනෙ-පිරිවරත් සමඟ ජෝර්දානයට යාමට සූදානම් වෙයි.ඔගස්ටීන් රොබට්ගේ චරිතය රඟපෑමට තෝරා ගැනුණේ 30 හැවිරිදි ඉංග්‍රීසි වේදිකා නළුවෙකු වන බෙන් ඩැනියෙල්ස් යග ඔහු හමුවේ අභියෝග දෙකක් තිබුණි.එකල දරාගත නොහැකි ඌෂ්ණත්වය මැද රඟපෑමය.(කැමරා කණ්ඩායම සතු පොලරොයිඩ් කැමරාවල ක්ෂණික ඡායාරූප පිටතට ආවේ උණු වී ඇද ගැසෙමිනි.) දෙකල ඩැනියෙල්ස්ගේ පෙම්වතිය නොහොත් චිත්‍රපටයේ කතා නායිකාව වූයේ දිවි දෙනක (සැබෑ ලෙස යොදාගත්තේ දිවියෙකිග) වීමය. ඒ හැරුණු විටල ඩැනියෙල්ස්ගේ ප්‍රථම සිනමා රංගනය වූයේද මෙයයි.

ලන්ඩනයේ සත්ව උද්‍යානයට ගිය ඩැනියෙල්ස්, දිවියන්ගේ හැසිරීම් ගැන උගත්තේය.තමන් චිත්‍රපට නළුවෙකු යැයි නොදන්නා දිවියෙකු සමඟ රඟපෑම මහත් අවදානමක් බව ඩැනියෙල්ස් දැන සිටියද,ඔහු ඊට සූදානම් විය.ඕනෑම මොහොතක සුළු වැරදීමකින් ඔහුගේ "පෙම්වතිය” ඔහු මතට පැන මරාදැමීමට ඉඩ තිබුණි.දර්ශන රූගත කෙරෙන ස්ථානවල වෛද්‍යවරු, ගිලන් රථ, පමණක් නොව හදිසි අවස්ථාවකදී ලබාදීම සඳහා ලේ බෝතල් පවා සූදානම් කර තිබුණේ එහෙයිනි.කෙසේ වෙතත් කිසිදු අනතුරකින් තොරව චිත්‍රපටය නිමා කෙරුණි. තම අත්දැකීම් ආවර්ජනය කරමින් ඩැනියෙල්ස් මෙසේ කීය.

"මම පළමු දවසේ කාන්තාරයට ආවෙ රාත්‍රියේ. රූගත කරන තැන පිහිටි මගේ කූඩාරමට මා ඇරලවූ ලැවීනියා, කෑමබීම මල්ලක් දී ආපසු ගියා.පසුදින අවදි වූ පසුවයි මා කාන්තාරයේ සැබෑ ස්වභාවය දුටුවේ. ඒ මොහොත් මා තුළ ඇතිවූ භ්‍රාන්තිය චිත්‍රපටය රූගත කර අවසන් වනතුරුම පැවතුණා.” ලැවීනියා පවසන අන්දමට කාන්තාරය ද මෙම චිත්‍රපටයේ වැදගත් චරිතයකි.

එනිසාම, ඇය සුදුසු කාන්තාරය සොයමින් බොහෝ වෙහෙසුණාය. නැමීබියා කතර රතු පැහැතිය.එය ඊජිප්තුවට නොගැළපේ. ටියුනීසියා කතර,වේදිකා දර්ශන තලයක් බඳුයග මොරොක්කෝ වාලුකාව, බොහෝ චිත්‍රපට සඳහා යොදාගෙන ඇත. ඕමාන් කතර සැබෑ ලෙසම දිවියන් සරණ තැනක් වුවද ඊට බලධාරීන්ගෙන් අවසර නොලැබුණි.අවසානයේ ඇය ජෝර්දානය තෝරා ගත්තාය.

ලැවීනියා කුරියර්ගේ චිත්‍රපටය තුළ බැල්සාක් ද ඇත. මනුෂ්‍යත්වය ද ඇත. තිරිසනුන් සතු කුරිරු බව මෙන්ම කුළුපග බව ද ඇත. ඒ සියල්ල අතරේ සිනමාවේදිනියකගේ කැපවීම හා අදිටන ද කැපී පෙනෙයි. "මෙය මේ තරම් දුෂ්කර වෙන බව මා කලින් හැඳිනගෙන සිටියා නම්, මා මේ චිත්‍රපටය නොකරන්නත් ඉඩ තිබුණා.” ලැවීනියා එසේ කියන්නේ සිය ගුරු මත්සුයේ දුන් අවවාදයක් ද සිහිපත් කරමිනි.'සුළඟ නරක නම් යාත්‍රා කරන්න එපා' එහෙත් ලැවීනියා එය නොතැකුවාය. කාන්තාර ලාලසාවල සිනමාවට මුසු කළාය.

කපිල කුමාර කාලිංග

Read 636 times Last modified on Wednesday, 03 July 2013 08:25
Body
Background Color
Text Color
Background Image